“Sonuncu müştəriyədək xidmətinizdəyik”

Bu yaxınlarda çalışdığım İdeal parfum və kosmetika mağazaları şəbəkəsində belə bir addım atmaq qərarına gəldim. Mağazaların giriş qapılarında olan standart açılış-bağlanış saatı olan lövhələrdən fərqli formada istifadə etmək lazım idi. Qapılardan təbii ki, ən çox müştərilər girib-çıxdığından onlara xoş gələn, müştəri məmnuniyyətinə işləyən bir “mesaj” lazım idi. Bu səbəbdən mağazaların qapılarında “sonuncu müştəriyədək xidmətinizdəyik” sözü yazılmış fərqli lövhəciklər asdıq. Artıq bütün mağazalarımızda bu tətbiq olunmaqdadır. Dünənə qədər və elə yarandığımız gündən də mağazadan son müştəri çıxanadək işləmə və bütün müştərilərə maksimum servis prinsipi üzərində işlədiyimizdən daxili işçilər üçün bu yenilik olmasa da, müştərilərin xoşuna gələcəyini düşünürəm. Onlar şablon ifadələrdən daha çox bu cür emosional mesajlara ehtiyac duyurlar. Açıq desəm “İdeal ilə hər yerdə gÖzəlSən” sloqanından sonra ən çox bəyəndiyim iş də elə bu “sonuncu müştəriyədək xidmətinizdəyik” lövhəsi olub. Ümumiyyətlə həmişə çalışmaq lazımdır ki, mağaza daxili və xaricində istənilən dizayn, konfiqurasiya və ya hansısa element işlənəcəksə, o müştərilərin məmnuniyyətinə, fayda əldə etməsinə və funksional rahatlığına xidmət etsin.